Wiedersehn macht Freude

Wiedersehn macht Freude

 

„Wiedersehn macht Freude“, seit me eifach äso,

das han i ou gmeint, bis i uf d’Wält bi cho.

 

Nach 50 Johr han i si wieder gseh,

mi Schuelschatz vom Bodesee.

 

I ha dänkt, die verzelli mir de äbe,

was me so Schöns machi i 50 Johr Läbe.

 

Wo n’i si de gseh ha, bin i verschrocke,

si isch jetz ä dicke, fette Brocke.

 

Alles Fiine isch verschwunde

U ligt äuä under der Fettschicht unde.

 

U trotzdäm, äs isch chum z’gloube,

überchöme mir beidi füechti Ouge.

 

Aber de het si sech zämegrafft

U het mer ihres Läbe zämegfasst.

 

I dr erschte Ehe heig si glitte,

si heige jede Tag nume gschtritte.

 

Zum Glück heig är bald ds’Zitliche gsägnet

U ihre dr Wäg für äs nöis Läbe gäbnet.

 

Di zwöiti Ehe heig ou nid gsprüet vo  Friede,

aber wenigschtens heige si de bald gschiede.

 

U sit däm heig si ä Hund,

so blib si wenigschtens gsund.

 

Süsch heig si no drei Chind erzoge,

u sech irgendwie dür z Läbe gloge.

 

U zwüschedri sig si no inegfloge uf äs paar Affe,

wo nume Gäld heige wölle u nüt schaffe.

 

Do hanere gseit si hätt mi halt nid eifach sölle hocke lo,

de wär ihres Läbe villicht ä chli andersch usecho.

 

Aber äbe, ou schpäti Iisicht

Macht kes früsches Gsicht.

 

 

 

Peter Schmied Mai 1st, 2021

Posted In: Allgemein