Sit d’Marina zu üs i’d Firma isch cho
Herrscht d’Ifersucht im Grossrumbüro
Verbreitet het sech das Ifersuchtsgift
Dür e heissi Liebesgschicht
Wo dr Urs d’Marina z’erscht Mol het gseh
Isch är zämegschmolze wie Früehligsschnee
Und denn hätt är sölle Rügge a Rügge mit dr Marina schaffe
Und schtändig uf dä saublöd Bildschirm gaffe
Zum Glück zwar het är nid müesse schtoh
Süsch hätts em d’Füess unde use gnoh
Taschte het är keini me troffe
Dr Schweiss ischem us de Poore gloffe
Drei Tag het är wie im Delirium kämpft
Und Gfühlsusbrüch mit Zigarette dämpft
Denn isch är z’Nacht zu dr Marina gange
Und het ere sis Lide gschtande
Dä Gang zu dr Marina het sich glohnt
Will är jetz bi ihre wohnt
Aber d’Marina isch nümm so frei
Dr Urs wott si ganz für sich ällei
Wenn si im Büro mit eme andere rett
Hett si nachhär äs Problem im Bett
Und wenn eine mit dr Marina äs Spässli wett mache
Het är nachhär nüt me z’lache
äs trifft en em Urs si böse Blick
Wie ne läbensgfährliche Blitz
D’Marina isch jetz immer in d’Arbeit versänkt
Dass jo kei Maa usser em Urs si ablänkt
Dr Kontakt mit Männer isch ire verbaut
Als Partner sin dr Urs und dr Computer erlaubt
Ds Klima isch jetz froschtig
D’Gsichter wärde roschtig
Und das alles isch ä Frucht
Vo dr Ifersucht
Peter Schmied Dezember 27th, 2019
Posted In: Texte