d Vorteil vo dr Ehe
Äs git Lüt, dene isch nümm ganz klar,
was d‘Vorteil sind vomene Ehepaar
Die verkenne dr Wärt vom Eheläbe
und lige mit ihrem Urteil völlig drnäbe
Will äs Ehepaar kennt keini Gränze,
wenn sech die zwöi perfekt ergänze
We nämlech sii öppis nid chaa,
de machts eifach dr Maa
Wird är nöime nid schlau,
de hett är no d‘Frau
Mängmol ergänze si sich sogar dialäktisch:
Wenn zum Bischpil sini These überzügend lutet,
hüt lueg i färn, will YB schuttet
und ihri Antithese hingäge,
si wöll go jogge trotz Räge
De chönnte si als Ehesynthese de yo,
dr Match luege im Fitness-Studio
Är macht öppis für‘d Gsundheit und gseht dr Match a dr Wand
u sie leert was Offside bedütet und jogget uf em louffende Band
Also dank dere Ehekoppelig,
git‘s ä Effiziänzverdoppelig
Aber ds grösste vo dr Ehe isch scho
dass me hi und här cha go
und äs isch immer öpper do
do chasch di druf verloh
Isch si ou nid dehei
bisch trotzdäm nid älei
Dur än Ehevertrag sind die zwöi inenand ine beamt
Mit Zwöikomponänteliim zu eim Ehepäckli verliimt
Und das isch d‘Magie vo dere ganze Sach
hei die zwöi ou ämol zäme Krach
Gheie si nid usenand,
dä Liim hebet und ou no äs Band
Äs sig denn, si tüege das brutal verschnide,
aber das louft de under em Thema „Liide“
U bi de meischte Kräch wei die beide
yo nid grad scheide
Also verschtöt mi richtig,
äs wär mir de scho wichtig
dass die zwöi trotz äm zäme chläbe
jedes sis eigene Läbe cha läbe
Peter Schmied Dezember 22nd, 2019