Mini Hobbys sind Singe und Tanze
Mis Problem isch jetz aber ächt,
i singe nid guet und tanze schlächt
Bim Tanze isch es äbe eso
Dass i mir sälber uf de Füess umeschtoh
Au bim Rhythmus äbe,
bin i immer liecht drnäbe
Bim Singe han i leider scho oft müesse ghöre
I söll mit däm Lärme nid witer schtöre
Drum sing i normalerwis nur für mi
I mim Baschtelchämmerli
Will bim Baschtle bin i rächt geschickt
I ha im Hushalt scho sehr vil gflickt
Säge, Schliiffe und Liime isch mir nid fremd
Also fürs Baschtle han i grosses Talänt
Mis Vogelhüsli isch würklich ä Pracht
I ha’s vo A bis Z sälber gmacht
Leider isch z Loch ä chli z chli
Und d’Vögel chöme eifach nid dri
Aber formschön isch äs schoo
Itz isch aber Baschtle so öppis bürgerlich chlikarierts,
äso öppi pensioniert Fruschtrierts
Und mine Fründe, de intellektuelle
chan i doch nid verzelle
mini gröschti Liebhaberei
sig d’Baschtelei
Vom Tanze chan i ou nüt säge
Will i keini Höhepünkt erläbe
und vom Singe schwig i lieber,
süsch verlange si no Lieder
Im Buhle um mine Fründ ihri Gunscht
Säg ich mim Baschtle jetz halt Kunscht
Will jedes vo mine konkrete Wärk
Het ungewollt symbolischi Wärt
Die sueche n’ i denn hinde dri
Und baue si interpretierend i
So chan i jetz sehr guet läbe,
als wahrhaftige Künschtler äbe.
Peter Schmied Dezember 6th, 2019
Posted In: Texte